پاکستان کے انڈر 19 ٹیم نے شاندار پرفارمنس دیتے ہوئے نیوزی لینڈ کو آئی سی سی ورلڈ کپ میں آٹھ وکٹوں سے شکست دے دی۔
ہرارے میں کھیلے گئے میچ میں پاکستان نے 111 رنز کا ہدف صرف 17.1 اوورز میں پورا کردیا، جس میں سمیر منہاس نے صرف 59 گیندوں پر 76 رنز کی ناقابل شکست اننگز کھیلی۔ انہوں نے دو چھکے اور 10 چوکے لگائے اور پاکستان کو آرام سے میچ جتوا دیا۔
عثمان خان 15 اور کپتان فرحان یوسف 11 ناٹ آؤٹ کے ساتھ دوسرے نمایاں بیٹسمین رہے۔ پاکستان کا یہ سپر سکس مرحلے میں پہلا میچ تھا اور اب اگلا میچ بھارت کے خلاف کھیلا جائے گا۔
پاکستان نے ٹاس جیت کے نیوزی لینڈ کو پہلے بیٹنگ کی دعوت دی اور تیز بالرز عبدالسبحان جنہوں نے چار وکٹیں حاصل کی 11 رنز پر اور علی رضا جنہوں نے تین وکٹیں حاصل کیں، نے مل کر نیوزی لینڈ کی بیٹنگ کو تہس نہس کردیا۔ تیسرے تیز بالر محمد صیام نے بھی ایک وکٹ حاصل کی۔
نیوزی لینڈ کی طرف سے صرف ان کے اوپنر یوگو بوگی نے اچھی اننگ کھیلتے ہوئے جارحانہ انداز میں صرف 27 گیندوں پر 39 رنز کیے، جس میں چھ چوکے اور دو چھکے شامل تھے۔ باقی کوئی بھی بیٹسمین پاکستانی بالرز کے سامنے نہیں ٹک پایا۔