چیئرمین پاکستان کرکٹ بورڈ محسن نقوی نے قومی کرکٹ ٹیم کے کھلاڑیوں سے ملاقات کی اور آسٹریلیا کے خلاف ٹی ٹوئنٹی سیریز میں کامیابی پر پوری ٹیم کو مبارکباد دی۔
اس موقع پر محسن نقوی نے کھلاڑیوں کی شاندار کارکردگی کو سراہتے ہوئے کہا کہ آپ سب نے اپنی محنت، ٹیم ورک اور پروفیشنل ازم کے ذریعے پاکستان کا نام روشن کیا ہے۔ انہوں نے کہا کہ محنت اور نظم و ضبط کا نتیجہ ہمیشہ جیت کی صورت میں سامنے آتا ہے۔
چیئرمین پی سی بی نے ٹیم منیجر نوید اکرم چیمہ، ہیڈ کوچ مائیک ہیسن، کپتان سلمان علی آغا اور دیگر کھلاڑیوں کو بھی خصوصی طور پر مبارکباد دی۔ محسن نقوی کا کہنا تھا کہ قومی ٹیم کی قابلِ تحسین کارکردگی کو شائقینِ کرکٹ نے بھی بھرپور انداز میں سراہا ہے۔
آخر میں چیئرمین پی سی بی محسن نقوی نے آخری ٹی ٹوئنٹی میچ کے لیے بھی قومی ٹیم کے لیے نیک تمناؤں کا اظہار کرتے ہوئے امید ظاہر کی کہ ٹیم آئندہ بھی اسی جذبے اور کارکردگی کا مظاہرہ کرے گی۔