وزیراعلیٰ پنجاب مریم نواز کی ہدایت پر سوات سے تعلق رکھنے والی 14 سالہ تائیکوانڈو اسٹار عائشہ ایاز کو مجموعی طور پر تین لاکھ روپے کا انعام دیا گیا ہے۔
صوبائی وزیر کھیل فیصل ایوب نے اسپورٹس بورڈ پنجاب کی جانب سے چیک عائشہ ایاز کو پیش کیا اور ذاتی طور پر انہیں ایک لاکھ روپے کا انعام بھی دیا۔
عائشہ ایاز پاکستان کی سب سے کم عمر بین الاقوامی تائیکوانڈو ایتھلیٹ ہیں جنہوں نے صرف 14 سال کی عمر میں 11 بین الاقوامی میڈلز جیتے اور عالمی و نیشنل مقابلوں میں 150 سے زائد میڈلز جیتنے والی پاکستان کی واحد کھلاڑی ہیں۔
صوبائی وزیر کھیل فیصل ایوب نے کہا کہ عائشہ ایاز کا روشن مستقبل ہے اور وہ مستقبل میں اولمپکس میں پاکستان کا نام روشن کریں گی۔ انہوں نے مزید کہا کہ عائشہ ایاز جیسی باصلاحیت بچیاں پورے پاکستان کا فخر ہیں اور حکومت پنجاب کی اولین ترجیح ایسے کھلاڑیوں کی سرپرستی ہے۔
عائشہ ایاز نے وزیراعلیٰ پنجاب اور صوبائی وزیر کھیل کا شکریہ ادا کیا اور کہا کہ وہ اپنی محنت اور کارکردگی سے ملک کا نام روشن کرنے کی کوشش جاری رکھیں گی۔