یومِ یکجہتی کشمیر کے موقع پر اسپورٹس بورڈ پنجاب کے زیرِ اہتمام ایک بھرپور اور شاندار ریلی کا انعقاد کیا گیا، جس میں سینکڑوں کھلاڑیوں، سپورٹس ڈیپارٹمنٹ پنجاب کے افسران اور ملازمین نے شرکت کی۔
ریلی کی قیادت سیکرٹری اسپورٹس پنجاب محمد علی اور ڈی جی اسپورٹس پنجاب خضر افضال چوہدری نے کی۔ ریلی نیشنل ہاکی اسٹیڈیم سے شروع ہو کر قذافی اسٹیڈیم تک نکالی گئی جہاں شرکاء نے جوش و جذبے کے ساتھ ’’کشمیر بنے گا پاکستان‘‘ کے نعرے لگائے۔
اس موقع پر سیکرٹری اسپورٹس پنجاب محمد علی نے خطاب کرتے ہوئے کہا کہ کشمیر پاکستان کی شہ رگ ہے اور پورا پاکستان اپنے کشمیری بھائیوں کے ساتھ کھڑا ہے۔ انہوں نے کہا کہ کشمیری عوام سے یکجہتی کے اظہار کے لیے اسپورٹس ایونٹس کا انعقاد کیا جا رہا ہے تاکہ دنیا کو واضح پیغام دیا جا سکے۔
ڈی جی سپورٹس پنجاب خضر افضال چوہدری نے کہا کہ یومِ یکجہتی کشمیر کے موقع پر ہاکی، فٹ بال اور تائی کوانڈو کے مقابلے منعقد کیے جا رہے ہیں۔ انہوں نے واضح کیا کہ کشمیر پاکستان کا حصہ ہے اور کشمیری بھائیوں سے یکجہتی کے لیے ریلی کا اہتمام کیا گیا ہے۔
ریلی میں تائی کوانڈو، ہاکی اور فٹ بال کے سینکڑوں کھلاڑیوں نے بھرپور جوش و جذبے سے شرکت کی اور کشمیری عوام کے حق میں یکجہتی کا اظہار کیا۔