کراچی کے علاقے خیابانِ اتحاد میں نصب ڈیجیٹل ایڈورٹائزمنٹ اسکرین پر نازیبا ویڈیو چلانے کے واقعے میں پولیس نے کارروائی کرتے ہوئے ملزم کو گرفتار کرلیا۔
پولیس کے مطابق واقعے کا مقدمہ گزشتہ روز گزری تھانے میں درج کیا گیا تھا جس کے بعد تحقیقات کا آغاز کیا گیا اور کارروائی کے دوران ملزم کو حراست میں لے لیا گیا۔ گرفتار ملزم کا تعلق اسی ایڈورٹائزنگ کمپنی سے ہے جو مذکورہ ڈیجیٹل اسکرین کی ذمہ دار تھی۔
ایف آئی آر کے مطابق کمپنی کے آپریشن ڈائریکٹر نے پولیس کو فون پر اطلاع دی کہ ڈی ایچ اے فیز 8 میں نصب ایس ایم ڈی اسکرین پر وقفے وقفے سے غیر اخلاقی ویڈیو کلپس چل رہے ہیں۔ اطلاع ملتے ہی متعلقہ اسکرین کو فوری طور پر بند کر دیا گیا تھا۔
حکام کے مطابق احتیاطی تدابیر کے طور پر ڈی ایچ اے کی اہم شاہراہوں کے علاوہ شاہراہِ فیصل اور کارساز روڈ پر نصب متعدد ڈیجیٹل ایڈورٹائزمنٹ اسکرینز کو بھی عارضی طور پر بند کر دیا گیا تاکہ کسی ناخوشگوار صورتحال سے بچا جا سکے۔