آسٹریلیا کی ٹیم کو آئی سی سی ٹی ٹوئنٹی ورلڈ کپ شروع ہونے سے ایک دن قبل ایک اور بڑا جھٹکا لگا ہے جب ان کے تجربہ کار تیز بالر جوش ہیزل وڈ فٹ نہ ہونے کی وجہ سے ٹورنامنٹ سے باہر ہوگئے۔
ہیزل وڈ کافی عرصہ سے فٹنس کے مسائل کا شکار ہیں اور حالیہ ہونے والی ایشیاء سیریز میں بھی بیمار ہوگئے تھے اور اس سے پہلے پاکستان میں ہونے والی آئی سی سی چیمپینز ٹرافی بھی نہیں کھیل پائے تھے۔
آسٹریلیا کے لیے مسئلہ یہ ہے کہ وہ پہلے سے ہی اپنے ٹیسٹ کپتان اور تیز بالر پیٹ کمنس کو بھی فٹنس کی وجہ سے اس ورلڈ کپ کے لیے کھو چکے ہیں۔ اس طرح سے آسٹریلیا کے دو سب سے زیادہ مایہ ناز اور تجربہ کار فاسٹ بالرز اس ورلڈ کپ میں ایکشن میں نظر نہیں آئیں گے۔
آسٹریلیا نے اب یہ فیصلہ کرنا ہے کہ وہ کس کو اسکواڈ میں لاتے ہیں۔ وہ اپنا پہلا میچ 11 فروری کو کولمبو میں آئرلینڈ کے خلاف کھیلے گا۔ یاد رہے کہ آسٹریلیا کی ٹیم پچھلے ہفتے ہی پاکستان میں ٹی ٹوئنٹی سیریز میں تینوں میچ ہار گئی تھی۔