امریکا کی ایسوسی ایٹ ممبر ٹیم نے اتوار کو دفاعی چیمپین بھارت کو آئی سی سی ٹی ٹوئنٹی ورلڈ کپ کے میچ میں پریشان کرکے رکھ دیا مگر آخر میں وہ ممبئی میں کھیلے جانے والے میچ میں 29 رنز سے ہار گئے۔
میچ میں بھارت نے جب بیٹنگ کی تو ایک وقت پر ان کی صرف 76 رنز پر چھ وکٹیں گر چکی تھی اور اسٹیڈیم میں موجود ہزاروں تماشائیوں پر چپ چھا گئی تھی۔ مگر بھارت کے کپتان سوریہ کمار یادو نے 84 کی شاندار اننگ کھیل کر اپنی ٹیم کو 161 رنز تک پہنچا دیا جبکہ ان کی نو وکٹیں گر چکی تھیں۔
یو ایس اے کی ٹیم کی شروع کی تین وکٹیں ہی پہلے تین اوور میں گر گئیں اور 20 اوور میں وہ آٹھ وکٹوں پر 132 کر پائے مگر جس طرح سے انہوں نے بھارت کی مضبوط ٹیم کو مشکلات میں ڈالا ان کی تعریف کی جا رہی ہے۔
ورلڈ کپ کے پہلے دن ہی پاکستان کو بھی نیدرلینڈز کے خلاف بہت محنت کر کے میچ جیتنا پڑا۔ نیدرلینڈز اور یو ایس اے کی پرفارمنس کے بعد یہ چیز واضح ہے کہ اس ورلڈ کپ میں اسوسی ایٹ ٹیم کسی بھی ٹیم کو اپ سیٹ کر سکتی ہے۔