وفاقی وزیر خزانہ و محصولات سینیٹر محمد اورنگزیب نے National School of Public Policy (این ایس پی پی)، پاکستان ایڈمنسٹریٹو اسٹاف کالج لاہور میں ”اسٹریٹجک پالیسی ڈائیلاگ“ کے تحت 124ویں نیشنل مینجمنٹ کورس کے شرکاء سے خطاب کیا۔
وزیر خزانہ نے اپنے خطاب میں پاکستان کی معاشی سمت، مالیاتی اصلاحات کے ایجنڈے اور پیچیدہ پالیسی چیلنجز سے نمٹنے کے لیے ادارہ جاتی مضبوطی کی اہمیت پر روشنی ڈالی۔ انہوں نے کہا کہ حکومت میکرو اکنامک استحکام کو مضبوط بنانے، ٹیکس نیٹ کو وسعت دینے، پبلک فنانشل مینجمنٹ کو بہتر بنانے اور شفافیت و احتساب کے فروغ کے لیے ساختی اصلاحات پر عمل پیرا ہے۔
سینیٹر محمد اورنگزیب نے اس بات پر زور دیا کہ پائیدار معاشی ترقی صرف مؤثر پالیسی سازی سے ممکن نہیں بلکہ اس کے لیے حکومتی سطح پر مؤثر عملدرآمد بھی ناگزیر ہے۔ انہوں نے کہا کہ سینئر سول سرونٹس پالیسی کے نفاذ اور ادارہ جاتی اصلاحات میں کلیدی کردار ادا کرتے ہیں۔
انہوں نے مالیاتی پائیداری، توانائی شعبے کی اصلاحات اور ماحولیاتی تبدیلی جیسے چیلنجز سے نمٹنے کے لیے اسٹریٹجک سوچ، ڈیٹا پر مبنی فیصلوں اور بین الوزارتی ہم آہنگی کی ضرورت پر بھی زور دیا۔
تقریب کے دوران شرکاء کو پالیسی ترجیحات، اصلاحات کے مراحل اور بدلتے ہوئے عالمی معاشی منظرنامے پر کھل کر سوال و جواب کا موقع بھی فراہم کیا گیا۔ وزیر خزانہ نے افسران کو اپنے اپنے شعبوں میں مستقبل بین اور حل پر مبنی طرزِ فکر اپنانے کی تلقین کی۔
یہ لیکچر ”اسٹریٹجک پالیسی ڈائیلاگ“ کا حصہ تھا جس کا مقصد قومی قیادت اور سینئر سول سروس افسران کے درمیان اہم معاشی و حکومتی امور پر براہِ راست مکالمے کو فروغ دینا ہے۔