پاکستان میں ٹیکسٹائل صنعت کے فروغ اور برآمدات میں اضافے کے لیے اہم پیش رفت سامنے آئی ہے، چینی کمپنی نے ملک میں جدید ٹیکسٹائل برآمدی مرکز قائم کرنے کا اعلان کیا ہے۔
چیلنج فیشن کے چیف ایگزیکٹو آفیسر چن یان کے مطابق کمپنی 2014 سے پاکستان میں سرمایہ کاری کررہی ہے اور اب جدید ٹیکنالوجی سے لیس ٹیکسٹائل اور گارمنٹس مینوفیکچرنگ کا بڑا منصوبہ شروع کرنے جارہی ہے۔
چن یان نے بتایا کہ کمپنی پاکستان سے اب تک 30 کروڑ ڈالر سے زائد مالیت کی ٹیکسٹائل مصنوعات برآمد کرچکی ہے۔ نئے منصوبے کے تحت کپڑے اور ملبوسات کی تیاری کیلئے جدید ترین ٹیکنالوجی سے آراستہ ایک بڑی فیکٹری قائم کی جائے گی۔
ان کے مطابق منصوبے سے 25 ہزار سے زائد روزگار کے مواقع پیدا ہوں گے، جبکہ سالانہ 40 کروڑ ڈالر سے زائد کی برآمدات کا ہدف مقرر کیا گیا ہے۔
چینی کمپنی کے اس منصوبے کو پاکستان کے ٹیکسٹائل شعبے میں غیر ملکی سرمایہ کاری، صنعتی توسیع اور برآمدی استعداد میں اضافے کی جانب اہم پیش رفت قرار دیا جا رہا ہے۔