پاکستان کے سابق ٹیسٹ فاسٹ بالر تنویر احمد اور بھارت کے سابق آف اسپنر ہربھجن سنگھ کے درمیان سوشل میڈیا پر لفظی جنگ چھڑ گئی ہے جس نے کرکٹ حلقوں میں ہلچل مچا دی۔
یہ تنازع اس وقت شروع ہوا جب تنویر احمد نے ایک بیان میں ہربھجن پر تنقید کی جس کے جواب میں ہربھجن سنگھ نے ویڈیو پیغام جاری کرتے ہوئے سخت الفاظ استعمال کیے۔ ہربھجن نے تنویر کو ایک معمولی کھلاڑی قرار دیتے ہوئے کہا کہ وہ خود کو بلاوجہ عظیم فاسٹ بولرز وسیم اکرم اور وقار یونس کے ہم پلہ سمجھتے ہیں۔
ویڈیو پیغام میں ہربھجن کی جانب سے سخت جملوں کے استعمال پر تنویر احمد نے بھی دو ٹوک ردعمل دیا اور خبردار کیا کہ اگر ان کے خلاف غیر مہذب زبان استعمال کی گئی تو وہ بھی جواب دینے میں کوئی لحاظ نہیں رکھیں گے۔
تنویر احمد نے ہربھجن پر دوغلے پن کا الزام عائد کرتے ہوئے کہا کہ ایک طرف وہ بھارتی کھلاڑیوں کو پاکستانی کرکٹرز سے ہاتھ نہ ملانے کا مشورہ دیتے ہیں، جبکہ دوسری جانب لیگز میں پاکستانی کھلاڑیوں کے ساتھ کمنٹری اور دیگر سرگرمیوں میں شریک ہوتے ہیں۔
واضح رہے کہ پاک بھارت مقابلوں سے قبل اکثر دونوں ممالک کے چند سابق کھلاڑیوں کے درمیان سوشل میڈیا پر بیاناتی جنگ دیکھنے میں آتی ہے، جسے شائقین کرکٹ خاصی دلچسپی سے فالو کرتے ہیں۔