پاکستان اور بھارت کے درمیان کشیدہ تعلقات کے باوجود اتوار کے دن آئی سی سی ورلڈ ٹی ٹوئنٹی کپ کی ٹرافی میدان میں رونمائی کے لیے دونوں ملکوں کے سابق کپتان وسیم اکرم اور روہت شرما ایک ساتھ لے کر آئے۔
دونوں لیجنڈز کے ساتھ آئی سی سی کے سی ای او سنجوک گپتا بھی موجود تھے اور جب یہ تینوں پریماداسا اسٹیڈیم میں ٹرافی لے کر آئے تو تماشائیوں نے زور شور سے ان کا خیر مقدم کیا۔
میچ کے دوران بھی کمنٹری میں وسیم اکرم اور وقار یونس بھارت کے سنیل گواسکر اور روی شاستری کے ساتھ کمنٹری کرتے رہے۔ وسیم اکرم اور وقار یونس کی آوازوں سے صاف لگ رہا تھا کہ وہ اپنی ٹیم کے پرفارمنس کو دیکھ کر بہت مایوس ہوئے ہیں۔
وسیم اکرم نے روہت شرما اور سنجوگ گپتا سے مصافحہ کیا اور وسیم اور روہت شرما کافی دیر تک کھڑے ہو کر بات کرتے رہے۔ اس کے برعکس کل کے میچ میں بھی بھارتی کپتان سوریا کمار یادو نے اپنے حریف کپتان سے ٹاس پر ہاتھ نہیں ملایا۔