آئی سی سی ٹی 20 ورلڈ کپ کے اہم میچ میں افغانستان نے یو اے ای کو 5 وکٹوں سے شکست دے دی۔
افغان ٹیم نے 161 رنز کا ہدف 19ویں اوور میں 5 وکٹوں کے نقصان پر حاصل کرلیا۔ عظمت اللہ عمرزئی نے شاندار آل راؤنڈ کارکردگی کا مظاہرہ کرتے ہوئے ٹیم کی فتح میں اہم کردار ادا کیا اور میچ کے بہترین کھلاڑی قرار پائے۔
ارون جیٹلی اسٹیڈیم دہلی میں کھیلے گئے گروپ ڈی کے میچ میں متحدہ عرب امارات کی ٹیم نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 160 رنز بنائے، صہیب خان نے 68 اور عالیشان شرافو نے 40 رنز بنائے۔ افغانستان کی جانب سے عظمت اللہ عمرزئی نے 4 کھلاڑیوں کو آؤٹ کیا۔
جواب میں افغانستان نے مطلوبہ ہدف 19.2 اوورز میں 5 وکٹوں کے نقصان پر حاصل کرلیا، ابراہیم زدران نے 53 رنز بنائے جبکہ عظمت اللہ عمرزئی ناقابل شکست 40 رنز بنا کر نمایاں رہے۔ یو اے ای کے جنید صدیق اور محمد عرفان نے دو دو کھلاڑیوں کو آؤٹ کیا۔ عظمت اللہ عمرزئی کو آل راؤنڈ کارکردگی پر میچ کا بہترین کھلاڑی قرار دیا گیا۔