آئی سی سی ٹی ٹوئنٹی ورلڈکپ میں بھارت سے المناک شکست کے بعد پاکستانی ٹیم مینجمنٹ نے میٹنگ میں سینیئر کھلاڑیوں کے کارکردگی کے اوپر شدید تحفظات کا اظہار کیا۔
ذرائع کا کہنا ہے کہ ٹیم مینجمنٹ نے کپتان بابراعظم اور فاسٹ بولر شاہین شاہ آفریدی کو بٹھانے پر غور شروع کر دیا ہے جبکہ شاداب خان کی حالیہ فارم بھی زیر بحث آئی۔ تینوں کھلاڑیوں کی کارکردگی پر سابق کرکٹرز اور سوشل میڈیا پر بھی سوالات اٹھائے جا رہے ہیں۔
ذرائع کے مطابق نمیبیا کے خلاف آخری گروپ میچ میں بینچ اسٹرینتھ کو آزمانے پر سنجیدگی سے غور کیا جا رہا ہے۔ بابراعظم کے متبادل کے طور پر فخر زمان اور خواجہ نافع دستیاب ہیں جبکہ شاہین آفریدی کی جگہ سلمان مرزا اور نسیم شاہ کو کھلانے پر غور کیا جا رہا ہے۔
ذرائع کا مزید کہنا ہے کہ نمیبیا کے خلاف میچ میں دو سے تین تبدیلیوں کا امکان ہے۔ پاکستان اگر یہ میچ جیت لیتا ہے تو سپر ایٹ مرحلے کے لیے کوالیفائی کر جائے گا۔
اعداد و شمار کے مطابق بابراعظم نے ورلڈکپ کے تین میچز میں مجموعی طور پر 66 رنز بنائے ہیں جن میں یو ایس اے کے خلاف 46 رنز کی اننگز شامل ہے جبکہ شاہین آفریدی نے تین میچز میں تین وکٹیں حاصل کی ہیں۔