قومی کرکٹ ٹیم کے سابق آل راؤنڈر عماد وسیم اور سوشل میڈیا انفلوئنسر نائلہ راجہ کی شادی کی تصدیق کے بعد ایک نیا تنازع سامنے آگیا ہے۔ عماد وسیم کی سابق اہلیہ ثانیہ اشفاق نے سوشل میڈیا پر ایک پوسٹ شیئر کرتے ہوئے سنگین الزامات عائد کر دیے۔
ثانیہ اشفاق نے دعویٰ کیا کہ دسمبر 2023 میں لاہور میں ان کے بچے کا اسقاط حمل کروایا گیا۔ انہوں نے اپنی پوسٹ میں عماد وسیم پر دھوکا دینے کا الزام عائد کرتے ہوئے کہا کہ ان کے پاس ویڈیو ثبوت بھی موجود ہے۔ تاہم ان الزامات پر عماد وسیم کی جانب سے تاحال کوئی باضابطہ ردعمل سامنے نہیں آیا۔
ثانیہ اشفاق نے اپنی پوسٹ میں اسلام آباد یونائیٹڈ کو بھی تنقید کا نشانہ بنایا اور کہا کہ ٹیم نے ایک دھوکے باز کو موقع دیا ہے۔ انہوں نے اسلام آباد یونائیٹڈ کے بائیکاٹ کا مطالبہ کرتے ہوئے سوشل میڈیا پر باقاعدہ مہم شروع کرنے کی اپیل بھی کی۔
واضح رہے کہ پاکستان سپر لیگ کے 11ویں ایڈیشن میں اسلام آباد یونائیٹڈ نے عماد وسیم کو 2 کروڑ 20 لاکھ روپے میں خریدا ہے۔ عماد وسیم کی جانب سے دوسری شادی کی تصدیق کے بعد یہ معاملہ مزید شدت اختیار کر گیا ہے اور سوشل میڈیا پر مختلف آرا سامنے آ رہی ہیں۔
یاد رہے کہ ثانیہ اشفاق نے پہلے ایک ویڈیو شیئر کرتے ہوئے دعویٰ کیا تھا کہ عماد وسیم اور نائلہ راجہ نے دوسری شادی کر لی ہے جس کے بعد عماد وسیم نے خود بھی سوشل میڈیا پر تفصیلی پیغام جاری کرتے ہوئے نکاح کی تصدیق کی تھی۔