پنجاب حکومت نے صوبہ بھر میں ڈیجیٹل پیمنٹ کے فروغ کے لیے اہم اقدام اٹھاتے ہوئے واضح ہدایات جاری کردی ہیں کہ کاروباری لین دین کو کیش کے بجائے کیو آر کوڈ اور راست سسٹم کے ذریعے یقینی بنایا جائے۔
اس حوالے سے جاری مراسلے میں تمام ڈپٹی کمشنرز کو ہدایت کی گئی ہے کہ صوبہ بھر کے کاروباری مراکز، دکانوں، اور پرچون فروشوں پر کیو آر کوڈ لازمی آویزاں کیے جائیں تاکہ عوام آسانی سے موبائل کے ذریعے ادائیگی کرسکیں۔
پنجاب حکومت کے مطابق کیش لیس نظام کے نفاذ سے عوام کو سہولت ملے گی اور مالی معاملات میں شفافیت اور احتساب کو فروغ ملے گا۔
رپورٹ کے مطابق صوبے کے تمام پیٹرول پمپس پر فوری طور پر ڈیجیٹل ادائیگی کا نظام نافذ کرنے کا حکم دیا گیا ہے، جبکہ پیٹرول پمپس کے لائسنس کے اجرا کو آن لائن بکنگ سے مشروط کردیا گیا ہے۔
مراسلے میں مزید کہا گیا ہے کہ پیٹرول پمپس پر کیو آر کوڈ کے ساتھ موبائل ادائیگی کے دیگر طریقوں کو بھی لازمی بنایا جائے تاکہ جدید ڈیجیٹل نظام کو مکمل طور پر نافذ کیا جاسکے۔