وزیراعلیٰ خیبر پختونخوا کے معاونِ خصوصی برائے اطلاعات شفیع جان نے واضح کیا ہے کہ بانی چیئرمین عمران خان کی رہائی کے لیے قائم کی جانے والی فورس کسی بھی صورت سیاسی ونگ نہیں ہوگی۔
نجی ٹی وی سے گفتگو کرتے ہوئے شفیع جان کا کہنا تھا کہ یہ فورس اسٹریٹ موومنٹ کے سلسلے میں تشکیل دی جائے گی اور اس میں شمولیت کے لیے باقاعدہ رکنیت اور حلف کا طریقہ کار وضع کیا جائے گا۔ انہوں نے کہا کہ کوئی بھی شہری اس فورس کا حصہ بن سکتا ہے۔
ان کا کہنا تھا کہ عمران خان کی رہائی کے بعد اس فورس کو ختم کر دیا جائے گا۔ احتجاجی سرگرمیوں کے حوالے سے نئی حکمتِ عملی پر غور جاری ہے اور رمضان المبارک کے بعد دوبارہ سرگرمیاں شروع کی جائیں گی۔
شفیع جان نے اس تاثر کی بھی تردید کی کہ احتجاج ختم کرنے کے لیے کسی قسم کے بیک ڈور رابطے ہوئے ہیں۔
واضح رہے کہ وزیراعلیٰ خیبر پختونخوا کی جانب سے عمران خان کی رہائی کے لیے خصوصی فورس بنانے کا اعلان کیا گیا تھا۔