وفاقی وزیر اطلاعات عطا تارڑ نے ایک بار پھر بانی پی ٹی آئی عمران خان سے کسی بھی قسم کی ڈیل یا رعایت سے متعلق خبروں کو سختی سے مسترد کر دیا ہے۔
اپنے بیان میں عطا تارڑ کا کہنا تھا کہ عمران خان کے ساتھ نہ کوئی ڈیل ہوئی ہے اور نہ ہی کسی قسم کی ڈھیل دی گئی ہے۔ انہوں نے واضح کیا کہ عمران خان عدالتوں سے سزا یافتہ ہیں اور انہیں کسی رعایت دینے کا تاثر سراسر غلط اور بے بنیاد ہے۔
وفاقی وزیر اطلاعات نے کہا کہ ڈیل یا رعایت سے متعلق گردش کرنے والی خبروں میں کوئی صداقت نہیں ہے اور یہ قیاس آرائیاں سیاسی مقاصد کے تحت پھیلائی جا رہی ہیں۔
انہوں نے اس بات پر بھی زور دیا کہ عمران خان کی صحت کے معاملے کو سیاسی مقاصد کے لیے استعمال نہیں کیا جانا چاہیے۔
واضح رہے کہ عطا تارڑ اس سے قبل بھی عمران خان سے متعلق ڈیل کی خبروں کی تردید کر چکے ہیں اور ایسی اطلاعات کو بے بنیاد قرار دے چکے ہیں۔