ایران پر ممکنہ امریکی حملے کی خبروں کے بعد پاکستان اسٹاک ایکسچینج شدید دباؤ کا شکار ہو گئی اور ایک ہی دن میں سب سے بڑی گراوٹ کا نیا ریکارڈ قائم ہو گیا۔
دورانِ ٹریڈنگ مارکیٹ 7200 پوائنٹس تک نیچے چلی گئی جبکہ کاروبار کے اختتام پر ہنڈریڈ انڈیکس 6682 پوائنٹس کی کمی کے بعد 172170 پوائنٹس پر بند ہوا۔
مارکیٹ ایک دن میں 178000، 177000، 176000، 175000، 174000 اور 173000 پوائنٹس کی چھ نفسیاتی حدیں برقرار نہ رکھ سکی۔ مالیاتی اداروں اور غیر ملکی سرمایہ کاروں کی بھاری فروخت کے باعث اسٹاک مارکیٹ دباؤ میں رہی۔
بینکنگ، آئل اینڈ گیس، سیمنٹ اور فرٹیلائزر کمپنیز کے شیئرز میں نمایاں فروخت دیکھی گئی۔آج مارکیٹ میں 27 ارب 30 کروڑ روپے مالیت کے 54 کروڑ شیئرز کا کاروبار ہوا۔