اسٹیٹ بینک نے رمضان المبارک کے دوران اپنے دفاتر اور کمرشل بینکوں کے اوقاتِ کار جاری کر دیے ہیں۔
اعلامیے کے مطابق رمضان کے دوران ملک بھر میں اسٹیٹ بینک کے دفاتر میں 6 گھنٹے کام ہوگا۔ پیر تا جمعرات اسٹیٹ بینک کے دفاتر صبح 9 بجے سے سہ پہر 3 بجے تک بغیر کسی وقفے کے کھلے رہیں گے۔
جمعہ کے روز اسٹیٹ بینک کے دفاتر عوام اور بینکوں کے لیے صبح 9 بجے سے دوپہر 12:30 بجے تک کھلے ہوں گے۔
اسی طرح رمضان المبارک میں کمرشل بینکس بھی پیر تا جمعرات صبح 9 بجے سے سہ پہر 3 بجے تک بغیر وقفے کے کھلے رہیں گے جبکہ جمعہ کے روز صبح 9 بجے سے 12:30 بجے تک پبلک ڈیلنگ جاری رہے گی۔