سیکیورٹیز اینڈ ایکسچینج کمیشن آف پاکستان نے اعلان کیا ہے کہ نان لسٹڈ کمپنیوں کے فزیکل شیئرز کو اب سینٹرل ڈیپازٹری سسٹم (سی ڈی ایس) کے ذریعے الیکٹرانک فارم میں منتقل کیا جائے گا۔
کمپنیوں کے شیئرز کی ٹرانزیکشن اب فزیکل فارم میں نہیں ہوگی اور تمام رائٹس ایشو، بونس، بائی بیک اور ٹرانسفر سے قبل شیئرز کو ڈیجیٹل کرنا ضروری ہوگا۔
ایس ای سی پی کا کہنا ہے کہ الیکٹرانک شیئرز سے فزیکل شیئرز سے وابستہ جعلسازی، چوری اور ضائع ہونے کے خطرات ختم ہوجائیں گے جبکہ ملکیت کا ریکارڈ محفوظ اور کمپنیوں کے شیئر تنازعات کا حل آسان ہوگا۔
مزید بتایا گیا کہ الیکٹرانک شیئرز سے شیئرز کی منتقلی تیز، محفوظ اور سیٹلمنٹ فوری ہوگی اور یہ بینک قرض کے لیے بطور ضمانت بھی استعمال کیے جا سکیں گے۔
ایس ای سی پی نے واضح کیا کہ آئندہ تمام نان لسٹڈ کمپنیوں کی شیئر ٹرانزیکشنز سی ڈی ایس کے ذریعے ہوں گی اور فزیکل شیئر رکھنے والی کمپنیوں کو ٹرانزیکشن سے قبل اپنے شیئرز ڈیجیٹل کرنا لازمی ہوگا۔