کراچی میں مرغی کے گوشت کی قیمت میں ایک بار پھر اضافہ دیکھنے میں آیا ہے، سرکاری نرخ مقرر ہونے کے باوجود بازاروں میں زائد قیمت وصول کی جا رہی ہے۔
سرکاری طور پر مرغی کے گوشت کا ریٹ 500 روپے فی کلو مقرر کیا گیا ہے تاہم مختلف مارکیٹوں میں گوشت 550 روپے فی کلو تک فروخت ہو رہا ہے۔
اسی طرح زندہ مرغی کا سرکاری ریٹ 332 روپے فی کلو مقرر ہے لیکن بازاروں میں زندہ مرغی 400 روپے فی کلو تک بیچی جا رہی ہے۔
شہریوں کا کہنا ہے کہ سرکاری نرخ نامے پر عملدرآمد نہ ہونے کے باعث مہنگائی کا بوجھ بڑھ رہا ہے۔ دوسری جانب دکانداروں کا مؤقف ہے کہ سپلائی اور اخراجات میں اضافے کے باعث قیمتیں بڑھی ہیں۔