آئی ایم ایف کے وفد نے پاکستان میں تیسرے اقتصادی جائزے کے سلسلے میں کراچی کا دورہ کیا جس کے دوران وفد نے وزارت خزانہ کے حکام اور اسٹیٹ بینک آف پاکستان کے گورنر سے ملاقاتیں کیں۔
اسٹیٹ بینک کے ہیڈ آفس میں مذاکرات کے دوران حکام نے آئی ایم ایف وفد کو پاکستان کی معاشی کارکردگی، مالیاتی ڈیٹا اور معاشی صورتحال پر تفصیلی بریفنگ دی۔ اس حوالے سے اسٹیٹ بینک کے چیف ترجمان نور احمد نے تصدیق کی کہ مذاکرات میں معاشی استحکام اور مالیاتی اعداد و شمار پر تبادلہ خیال کیا گیا۔
دورے کا بنیادی مقصد 7 ارب ڈالر کی توسیعی فنڈ سہولت کے تحت پاکستان کے تیسرے اقتصادی جائزے کو مکمل کرنا ہے۔ علاوہ ازیں آئی ایم ایف وفد 1.1 ارب ڈالر کے آر ایس ایف پروگرام کے تحت دوسرے جائزے پر بھی غور کرے گا۔
اس جائزے سے نہ صرف مالیاتی استحکام کی تصویر واضح ہوگی بلکہ پاکستان اور آئی ایم ایف کے درمیان اقتصادی شراکت داری کو مزید مستحکم کرنے میں بھی مدد ملے گی۔