پاکستان سپر لیگ سیزن 11 کا فائنل ممکنہ طور پر پاکستان کے باہر نیوٹرل وینیو پر کروانے پر غور کیا جا رہا ہے ذرائع کے مطابق پی ایس ایل مینجمنٹ اور فرنچائزز کے اجلاس میں اس حوالے سے اہم گفتگو ہوئی۔
ذرائع نے بتایا کہ پی ایس ایل پوری دنیا میں مقبول ہے اور اوورسیز پاکستانی اس کے فائنل کو اپنے ملک میں دیکھنے کے خواہاں ہیں جس پر مینجمنٹ نے فائنل کے انعقاد کے لیے مختلف متبادل جگہوں پر غور کیا۔
ذرائع کے مطابق پی ایس ایل فائنل کے لئے انگلینڈ، دبئی یا امریکا میں سے کسی ایک میں کروائے جانے کا امکان ہے اور امریکا اور انگلینڈ پی ایس ایل فائنل کی میزبانی کے لئے مضبوط امیدوار ہیں۔
فرنچائزز فائنل بیرون ملک کھیلنے کے فیصلے کے لیے مشاورت کر رہی ہیں اور حتمی فیصلہ اجلاس کے بعد کیا جائے گا۔پی ایس ایل سیزن 11 کا آغاز 26 مارچ سے شیڈول ہے جس میں فائنل کے انعقاد کا مقام سیزن کے دوران حتمی طور پر طے کیا جائے گا۔