بلوچستان ضلع کیچ کے علاقے بلیدہ میناز میں دہشتگردوں نے بلوچ خاندان کے گھر پر حملہ کرکے بچوں اور خواتین سمیت 6 افراد کو قتل کردیا۔
ذرائع کے مطابق دہشتگردوں نے گھر پر اندھا دھند فائرنگ کی جس کے نتیجے میں گھر میں موجود افراد موقع پر جاں بحق ہوگئے۔ حملہ آوروں نے فائرنگ کے بعد گھر کو مکینوں سمیت جلا دیا، جس سے پورا گھر جل کر خاکستر ہوگیا۔
واقعے کی اطلاع ملتے ہی سیکیورٹی فورسز کی بھاری نفری موقع پر پہنچ گئی اور علاقے کو گھیرے میں لے کر شواہد اکٹھے کرنا شروع کردیے۔ سیکیورٹی ذرائع کے مطابق واقعے کی تحقیقات شروع کردی گئی ہیں جبکہ دہشتگردوں کی تلاش کے لیے سرچ آپریشن بھی جاری ہے۔
حکام کا کہنا ہے کہ واقعے میں ملوث عناصر کو جلد قانون کے کٹہرے میں لایا جائے گا۔