ابوظہبی میں آج ہونے والے پاکستان شاہینز اور انگلینڈ لائنز کی ٹیم کے درمیان دوسرا ون ڈے انٹرنیشنل علاقائی حالات کی وجہ سے منسوخ کردیا گیا ہے۔
پاکستان کرکٹ بورڈ کے ایک ترجمان نے بتایا کہ دونوں ٹیموں کے کھلاڑیوں اور آفیشلز کو ہوٹل میں رہنے کی تاکید کی گئی ہے اور انگلینڈ کرکٹ بورڈ کے ساتھ مشاورات جاری ہے کہ مزید آگے کیا اقدام کیے جائیں۔
انہوں نے کہا کہ مشاورت کے بعد یہ فیصلہ ہوگا کہ آیا سیریز کو ابوظہبی میں ہی جاری رکھا جائے یا پھر پاکستان منتقل کردیا جائے۔
پاکستان شاہینز اور انگلینڈ لائنز کے درمیان ابھی ون ڈے سیریز کے چار میچ باقی ہے جبکہ دونوں ٹیمیں پہلے ہی ابوظہبی میں تین میچز کی ٹی ٹونٹی سیریز اور پہلا ون ڈے کھیل چکے ہیں۔
ترجمان نے کہا کہ کسی صورت کھلاڑیوں کی حفاظت اور سلامتی خطرے میں نہیں ڈال سکتے۔ پاکستان کرکٹ کرکٹ بورڈ اس سیریز کی میزبانی کررہا ہے۔