کراچی کے علاقے گلشن اقبال کے عزیز بھٹی تھانے کے اہلکار کی مفت بریانی نہ ملنے پر دکان دار سے بدتمیزی اور دھمکی دینے کی ویڈیو سوشل میڈیا پر وائرل ہوگئی ہے۔
ویڈیو میں اہلکار کو دکان پر موجود عملے کو ہراساں کرتے اور دھمکیاں دیتے دیکھا گیا جس میں انہوں نے کہا مفت بریانی دو ورنہ دیگیں اٹھا کر تھانے لے جاؤں گا۔
واقعے پر شہریوں کی جانب سے شدید ردعمل ظاہر کیا گیا اور پولیس حکام سے مطالبہ کیا گیا کہ ناجائز اختیارات کے استعمال پر سخت نوٹس لیا جائے۔
اس پر ایس ایس پی ایسٹ نے فوری ایکشن لیتے ہوئے بدتمیزی میں ملوث دونوں اہلکاروں کو معطل کر دیا اور انکوائری کا حکم دے دیا۔ انکوائری افسر کی رپورٹ کی روشنی میں مزید سخت محکمانہ کارروائی کی جائے گی۔