آل پاکستان گڈز ٹرانسپورٹ اونرز ایسوسی ایشن کے وفد نے وفاقی وزیر بحری امور جنید انوار چوہدری سے ملاقات کی جس میں کراچی کی بندرگاہوں سے اندرونِ ملک جانے والی اوورلوڈ گاڑیوں کی روک تھام پر تفصیلی تبادلہ خیال کیا گیا۔
ملاقات کے دوران وفد نے مؤقف اختیار کیا کہ اوورلوڈنگ سڑکوں کی تیزی سے تباہی اور ٹریفک حادثات میں اضافے کی بڑی وجہ بن رہی ہے۔ ٹرانسپورٹرز کے مطابق اس عمل سے قومی خزانے کو بھاری نقصان پہنچتا ہے جبکہ انسانی جانوں کو بھی شدید خطرات لاحق ہوتے ہیں۔ وفد نے مطالبہ کیا کہ بندرگاہوں سے نکلنے والی گاڑیوں کی سخت نگرانی اور وزن کی مکمل جانچ کو یقینی بنایا جائے۔
وفاقی وزیر جنید انوار چوہدری نے یقین دہانی کرائی کہ پورٹ گیٹس پر ویٹ چیکنگ سسٹم کو مزید مؤثر اور جدید بنایا جائے گا تاکہ اوورلوڈ گاڑیوں کو بروقت روکا جا سکے۔ انہوں نے کہا کہ ایکسل لوڈ قوانین پر مکمل عملدرآمد یقینی بنایا جائے گا اور خلاف ورزی کرنے والوں کے خلاف بلاامتیاز کارروائی ہوگی۔