وزیر خزانہ محمد اورنگزیب کی زیر صدارت پیٹرولیم مانیٹرنگ کمیٹی کا دوسرا اجلاس منعقد ہوا جس میں ملک میں پیٹرولیم مصنوعات کے ذخائر اور فراہمی کی صورتحال کا جائزہ لیا گیا۔
اجلاس کے دوران حکام نے بتایا کہ پیٹرول، ڈیزل، ایل پی جی اور ایوی ایشن فیول کے ذخائر تسلی بخش ہیں اور حکومت روزانہ کی بنیاد پر صورتحال پر نظر رکھے ہوئے ہے۔ وزیر خزانہ نے اس بات پر زور دیا کہ پیٹرولیم مصنوعات کی بلا تعطل فراہمی اولین ترجیح ہے۔
کمیٹی نے خطے میں غیر یقینی صورتحال، خاص طور پر آبنائے ہرمز کی صورتحال پر بھی گہری نظر رکھنے کی ضرورت پر بات کی۔ اجلاس میں وزیر خزانہ نے ہدایت دی کہ پیٹرولیم مصنوعات کی ذخیرہ اندوزی اور اسمگلنگ کی روک تھام یقینی بنائی جائے۔
مزید برآں اجلاس میں ایل این جی اور ایل پی جی کی بلا تعطل فراہمی کے لیے ہنگامی منصوبے زیر غور آئے جبکہ اضافی خام تیل کے حصول کے لیے دوست ممالک سے رابطے جاری رکھنے پر بھی تبادلہ خیال کیا گیا۔