آئی سی سی ٹی ٹوئنٹی ورلڈ کپ جیتنے والی بھارت کی ٹیم کے ہیڈ کوچ گوتم گمبھیر نے دو سابق کھلاڑیوں کو خراج تحسین پیش کیا ہے اور ان کو اتوار کے روز ورلڈ کپ کے فائنل میں کامیابی حاصل کرنے کا ذمہ دار ٹھہرایا ہے۔
گمبھیر نے فائنل کے بعد میڈیا کانفرنس میں کہا کہ سابق کپتان اور ہیڈ کوچ راہول ڈرائیوڈ اور سابق بیٹسمین وی وی ایس لکشمن کو پورا کریڈٹ جاتا ہے بھارتی ٹیم کی کامیابی کا، اتوار کی شب بھارت نے نیوزی لینڈ کو بڑی شکست دے کر مسلسل دوسری دفعہ ٹی ٹوئنٹی ورلڈ کپ کا فائنل جیتا اور ساتھ ہی اب وہ واحد ٹیم ہے جنہوں نے تین دفعہ ٹی ٹوئنٹی فارمیٹ کا ورلڈ کپ جیتا ہے۔
گوتم گمبھیر کی قیادت میں بھارت نے پچھلے سال آئی سی سی چیمپئنز ٹرافی اور ایشیا کپ کے ٹائٹل بھی جیتے تھے، ہیڈ کوچ نے کہا کہ راہول ڈرائیوڈ نے وہ بنیاد رکھی جس کی وجہ سے آج بھارت کی ٹیم اتنی مضبوط ہے جبکہ لکشمن نے نیشنل کرکٹ اکیڈمی سے نوجوان اور نئے کھلاڑیوں کو تیار کر کے بھیجا ہے، ان دونوں سابق کھلاڑیوں کو میں خراج تحسین پیش کرتا ہوں کہ ان کی محنت آج رنگ لائی ہے اور آج ہم ورلڈ کپ چیمپین بن گئے ہیں۔