وفاقی حکومت نے پیٹرولیم مصنوعات کی غیرقانونی ذخیرہ اندوزی اور ممکنہ قلت کو روکنے کے لیے سپلائی چین کی کڑی نگرانی کا فیصلہ کرلیا ہے اور اس سلسلے میں تمام صوبائی حکومتوں کو ہدایات جاری کردی گئی ہیں۔
اوگرا ذرائع کے مطابق پیٹرولیم مصنوعات کی سپلائی چین کی ڈیجیٹل ٹریکنگ کی جائے گی اور درآمد سے لے کر پیٹرول پمپس تک پہنچنے تک مکمل ڈیجیٹل مانیٹرنگ ہوگی۔
ذرائع کا کہنا ہے کہ اس اقدام کا مقصد پیٹرول اور ڈیزل کی مصنوعی قلت اور غیرقانونی ذخیرہ اندوزی کو روکنا ہے۔
رپورٹ کے مطابق رجسٹرڈ پیٹرول پمپس کے علاوہ کسی اور کو پیٹرول اور ڈیزل کی فراہمی پر کارروائی کی جائے گی جبکہ ڈپوز سے نکلنے والے تیل اور فروخت ہونے والی مقدار کا مکمل ریکارڈ رکھا جائے گا۔
اوگرا ذرائع کے مطابق تمام ریکارڈ وزارت توانائی، قانون نافذ کرنے والے اداروں اور ایف بی آر کو بھی دستیاب ہوگا تاکہ سپلائی اور فروخت کے عمل کی موثر نگرانی یقینی بنائی جاسکے۔