پورٹ قاسم پر ایل پی جی بردار بحری جہازوں کی آمد کے بعد ملک میں ایل پی جی کی سپلائی میں بہتری اور قیمتوں میں کمی کا امکان ظاہر کیا جا رہا ہے، جبکہ گیس سسٹم میں لائن پیک بھی بہتر ہونے کی توقع ہے۔ایل پی جی بردار بحری جہازوں کی آمد و ترسیل کی تفصیلات ہماری ویب کو موصول ہو گئی۔
بحری جہاز نیویگیٹر اٹلانٹک اس وقت پورٹ قاسم کے ای وی ٹی ایل ٹرمینل پر موجود ہے جہاں سے تقریباً 12 ہزار ٹن ایل پی جی ڈسچارج کی جا رہی ہے۔ اسی طرح دوسرا جہاز نیویگیٹر ایریز ایس ایس جی سی ٹرمینل پر موجود ہے جس سے تقریباً 11 ہزار ٹن ایل پی جی حاصل کی جائے گی۔
پورٹ قاسم انتظامیہ کے مطابق السواٹر نامی بحری جہاز تقریباً 3700 ٹن ایل پی جی کے ساتھ بندرگاہ کے باہر ڈسچارجنگ کے انتظار میں کھڑا ہے جبکہ ایم ڈی 23 جہاز 3500 ٹن ایل پی جی ڈسچارج کرنے کے بعد بندرگاہ کے باہر موجود ہے۔
انتظامیہ کا کہنا ہے کہ ان درآمدی جہازوں کے ذریعے مجموعی طور پر تقریباً 30 ہزار ٹن کے قریب ایل پی جی سسٹم میں شامل کی جا رہی ہے جس سے ملک میں سپلائی بہتر ہونے اور قیمتوں میں استحکام آنے کی توقع ہے۔