عیدالفطر کی آمد کے ساتھ بیرونِ ملک مقیم پاکستانیوں کی جانب سے ترسیلاتِ زر میں نمایاں اضافہ ریکارڈ کیا گیا ہے۔ اسٹیٹ بینک آف پاکستان کے مطابق فروری کے دوران اوورسیز پاکستانیوں نے 3 ارب 30 کروڑ ڈالر وطن بھیجے۔
اسٹیٹ بینک کے اعداد و شمار کے مطابق سالانہ بنیاد پر فروری میں ترسیلاتِ زر میں 5 فیصد اضافہ ریکارڈ کیا گیا۔ رواں مالی سال کے پہلے سات ماہ کے دوران بیرونِ ملک مقیم پاکستانی مجموعی طور پر 26 ارب 50 کروڑ ڈالر وطن بھیج چکے ہیں، جو گزشتہ سال کے مقابلے میں 10.5 فیصد زیادہ ہے۔
اعداد و شمار کے مطابق فروری میں متحدہ عرب امارات میں مقیم پاکستانی سب سے آگے رہے جنہوں نے تقریباً 70 کروڑ ڈالر پاکستان بھیجے۔ اس کے بعد سعودی عرب میں مقیم پاکستانیوں نے 68 کروڑ 55 لاکھ ڈالر وطن بھیج کر دوسرا نمبر حاصل کیا۔
اسی طرح برطانیہ میں مقیم پاکستانیوں نے فروری کے دوران 53 کروڑ ڈالر جبکہ امریکا میں مقیم پاکستانیوں کی جانب سے 32 کروڑ ڈالر پاکستان بھیجے گئے۔