پشاور میں مچنی گیٹ کے قریب ڈھائی کروڑ روپے کی بینک ڈکیتی ناکام بنانے والا اے ایس آئی بہار علی شدید زخمی ہونے کے بعد اسپتال میں دم توڑ گیا۔ پولیس کے مطابق بہار علی ڈکیتی کی اطلاع ملنے پر فوری طور پر موقع پر پہنچے اور رقم لوٹ کر فرار ہونے والے ڈاکوؤں کو روکنے کی کوشش کی۔ اس دوران ڈاکو نے ان پر فائرنگ کی جس کے نتیجے میں وہ شدید زخمی ہوگئے اور زخموں کی تاب نہ لاتے ہوئے شہید ہوگئے۔
اے ایس آئی بہار علی کی بہادری کی بدولت ڈکیتی ناکام رہی اور بڑی رقم محفوظ رہی۔
شہید کی نماز جنازہ ملک سعد شہید پولیس لائنز پشاور میں پورے سرکاری اعزاز کے ساتھ ادا کی گئی جس میں انسپکٹر جنرل آف پولیس خیبرپختونخوا ذوالفقار حمید، ایڈیشنل آئی جیز، سی سی پی او پشاور ڈاکٹر میاں سعید احمد، پاک آرمی کے افسران، پولیس افسران اور لواحقین نے شرکت کی۔
پولیس حکام نے اے ایس آئی بہار علی کی قربانی کو غیر معمولی جرات قرار دیتے ہوئے کہا کہ ان کی قربانی ہمیشہ یاد رکھی جائے گی۔