انٹرنیشنل کرکٹ کونسل نے کرپشن کوڈ کی خلاف ورزی پر ویسٹ انڈیز کے کھلاڑی جیون سیئرلز اور ٹیم آفیشل چترانجن راٹھوڑ اور ٹریون گرفتھ کو معطل کردیا۔
بارباڈوس میں ہونے والے بم ٹین لیگ میں کرپشن کے الزامات پر انہیں معطل کیا گیا، آئی سی سی کے مطابق کرکٹ ویسٹ انڈیز کے اینٹی کرپشن کوڈ کی متعدد خلاف ورزیوں پر جیون سیئرلز، ٹیم آفیشل چترانجن راٹھوڑ اور ٹریون گرفتھ کو معطل کیا گیا۔
آئی سی سی کا کہنا ہے کہ ٹائٹنز ٹیم کے مالک چترانجن راٹھوڑ پر تین جبکہ جیون سیئرلز پر 4 الزامات لگائے گئے۔
تینوں افراد پر فکسنگ کرنے یا اس کی سازش میں شامل ہونے, جرم پر اکسانے اور تحقیقات میں تعاون نہ کرنے کے الزامات ہیں۔
ٹریون گرفتھ کو آئی سی سی کوڈ کی خلاف ورزی کے تحقیقات میں تعاون نہ کرنے پر بھی چارج کیا گیا۔ تینوں کو ہر طرز کی کرکٹ کی سرگرمیوں سے معطل کیا گیا ہے۔