پاکستان کرکٹ بورڈ نے پاکستان سپر لیگ 11 کے لیے کھلاڑیوں کی ٹریڈ ونڈو باضابطہ طور پر کھول دی ہے جو 18 مارچ تک کھلی رہے گی۔ فرنچائزز کو ٹورنامنٹ قوانین اور سیلری کیپ کے مطابق کھلاڑیوں کی ٹریڈ کرنے کی اجازت ہوگی۔
پی ایس ایل 11 کی ٹریڈ ونڈو میں تین طرح کی ٹریڈز ممکن ہیں، پلیئر فار پلیئر، پلیئر فار منی، اور پلیئر پلس منی۔ کسی بھی ٹریڈ کو حتمی شکل دینے کے لیے پاکستان کرکٹ بورڈ کی منظوری ضروری ہوگی۔
پی سی بی نے ملتان سلطانز کو سیلری کیپ میں خصوصی رعایت دیتے ہوئے 1 کروڑ 20 لاکھ روپے کا اضافہ کیا ہے جس سے وہ مزید دو کھلاڑی اپنے اسکواڈ میں شامل کر سکیں گے، اور اسکواڈ کی مجموعی تعداد 22 کھلاڑی تک پہنچ جائے گی۔ تاہم میچ ڈے اسکواڈ میں صرف 20 کھلاڑی شامل ہوں گے۔
ٹریڈ ونڈو کے دوران ملتان سلطانز اور کوئٹہ گلیڈی ایٹرز کے درمیان چار کھلاڑیوں کی ٹریڈ مکمل ہوئی ہے۔ ملتان سلطانز کے اسکواڈ میں فیصل اکرم اور عرفات منہاس شامل ہو گئے ہیں، جو قبل ازیں کوئٹہ گلیڈی ایٹرز کا حصہ تھے۔ اس کے بدلے کوئٹہ گلیڈی ایٹرز کو احمد دانیال اور جہانزیب سلطان منتقل کیے گئے اور ساتھ ہی کوئٹہ گلیڈی ایٹرز کو ساڑھے 12 لاکھ روپے بھی ملیں گے۔
پی ایس ایل 11 26 مارچ سے 3 مئی تک پاکستان کے چھ شہروں میں کھیلا جائے گا، اور فرنچائزز اپنی ٹیموں کو مضبوط کرنے کے لیے اس ٹریڈ ونڈو سے بھرپور فائدہ اٹھائیں گی۔