کراچی پورٹ کی گہرائی میں اضافے کیلیے ڈریجنگ شروع

کراچی پورٹ ٹرسٹ کے مین چینل کی ڈریجنگ کا کام آج سے باقاعدہ شروع کر دیا گیا ہے جس کا مقصد بندرگاہ کی گہرائی میں اضافہ اور بحری صلاحیت کو بہتر بنانا ہے۔

وفاقی وزیر بحری امور محمد جنید انوار چوہدری کے مطابق اس منصوبے کے تحت چینلز کی گہرائی 14 میٹر تک بڑھائی جائے گی، جبکہ 14 برتھس کی گہرائی 15.5 میٹر تک کی جائے گی۔

انہوں نے بتایا کہ ڈریجنگ مکمل ہونے کے تقریباً تین ماہ بعد بڑے جہازوں کی آمد ممکن ہو سکے گی، اور 350 میٹر طویل اور 100,000 جی آر ٹی کے جہاز بھی بندرگاہ پر لنگر انداز ہو سکیں گے۔

وفاقی وزیر کا کہنا تھا کہ اس منصوبے سے نہ صرف بندرگاہ کی استعداد میں نمایاں اضافہ ہوگا بلکہ جہازوں کی آمد و رفت بھی تیز ہوگی، جس سے تجارتی سرگرمیوں کو فروغ ملے گا اور ملکی معیشت کو فائدہ پہنچے گا۔