مہینوں کی تیاری کے بعد اسٹاک مارکیٹ میں نافذ کیا گیا نیا ادائیگی کا نظام ٹی پلس ون سیٹلمنٹ سسٹم متنازع ہو گیا ہے اور ایس ای سی پی اور اسٹاک ایکسچینج نے اپنے فیصلے پر رجوع کر لیا ہے۔
ذرائع کے مطابق فروری میں شیئرز کے سودوں کی ایک دن میں سیٹلمنٹ کا یہ نیا نظام نافذ کیا گیا تھا جبکہ اس سے پہلے یہ عمل ٹی پلس ٹو کے تحت دو دن میں مکمل ہوتا تھا۔
ایس ای سی پی نے اسٹاک مارکیٹ کے اسٹیک ہولڈرز کو خط لکھ کر مشاورت اور تجاویز طلب کر لی ہیں۔ خط میں اسٹاک ایکسچینج، سی ڈی سی، نیشنل کلیئرنگ، بروکرز اور میوچل فنڈز کو بھی مخاطب کیا گیا ہے۔
بروکرز ذرائع کے مطابق، ٹی پلس ون سیٹلمنٹ سسٹم کا نفاذ مکمل تیاری کے بغیر ہوا اور ایک دن میں سودوں کی سیٹلمنٹ سے مارکیٹ پر منفی اثر پڑا ہے۔ مزید کہا گیا کہ ایک دن کے اندر شیئرز کی ادائیگی و وصولی کا نظام دیگر رائج ادائیگی کے سسٹمز سے منسلک نہیں ہے۔ایس ای سی پی نے عید کے بعد دو ہفتوں کے اندر ٹی پلس ون سسٹم پر حتمی فیصلہ کرنے کا عندیہ دیا ہے۔