آئی ایم ایف نے پاکستان سے ڈو مور کا مطالبہ کرتے ہوئے ٹیکس چوری کے خاتمے کیلیے جدید نظام متعارف کرانے اور ڈیجیٹل انوائسنگ سسٹم پر تیزی سے عملدرآمد کی ہدایت کردی۔
ذرائع کے مطابق پاکستان اور آئی ایم ایف کے درمیان ورچوئل اقتصادی جائزہ مذاکرات جاری ہیں، جس میں محصولات بڑھانے اور ٹیکس نظام کو مؤثر بنانے پر زور دیا گیا۔ اجلاس میں فیکٹریوں اور دکانوں کی پیداوار اور فروخت کی سخت نگرانی کا فیصلہ بھی کیا گیا ہے۔
ایف بی آر حکام کا کہنا ہے کہ ٹیکس دہندگان کی جانب سے عدالتوں سے رجوع کرنے کے باعث وصولیوں میں مشکلات پیش آرہی ہیں، جبکہ اس وقت صرف ایک تہائی کاروبار مکمل ڈیٹا فراہم کر رہے ہیں۔
ذرائع کے مطابق ٹیکس آڈٹس کے ذریعے مخصوص آمدن حاصل کرنے کا ہدف مقرر کیے جانے کا بھی امکان ہے، جس سے ٹیکس نیٹ کو وسعت دینے میں مدد ملے گی۔