پاکستان ویمن کرکٹ ٹیم کے مینٹور وہاب ریاض نے کہا ہے کہ ڈومیسٹک ٹورنامنٹ شروع ہوگا تو اس میں کھلاڑیوں کو بغور مانیٹر کیا جائے گا۔
لاہور میں وہاب ریاض نے ویمن کرکٹ ٹیم کے اسکلز کیمپ کے حوالے سے اظہار خیال کرتے ہوئے کہا کہ کیمپ کا مقصد فیلڈنگ اور فٹنس کو بہتر بنانا تھا، فیلڈنگ اور فٹنس میں پہلے سے بہتری دیکھی گئی ہے۔
وہاب ریاض کا کہنا تھا کہ فیلڈنگ اور فٹنس کے شعبے کو تسلسل کے ساتھ دیکھنے کی ضرورت ہوتی ہے، کرکٹرز کو بھی بار بار یہ یاد دلایا جاتا ہے کہ ان کی بڑی اہمیت ہے۔
انھوں نے کہا کہ چھ سات روز کیمپ کے لیے کم ہیں لیکن پھر بھی اس پر سخت محنت کی گئی، ان کا کہنا تھا کہ ابھی ڈومیسٹک کا ٹورنامنٹ شروع ہوگا تو اس میں کھلاڑیوں کو بغور مانیٹر کیا جائے گا، جو کھلاڑی پول میں شامل ہیں ان کی کارکردگی کا جائزہ لیا گیا ہے۔