پاکستان کرکٹ بورڈ نے حکومت کے ساتھ مشاورت کے بعد فیصلہ کیا ہے کہ پاکستان سپر لیگ (پی ایس ایل) کے شروع کے دن کے میچز تماشائیوں کے بغیر کھیلے جائیں گے۔
لاہور میں پریس کانفرنس کے دوران پی سی بی کے چیئرمین محسن نقوی نے بتایا کہ آغاز کے میچز کے دوران اور جب تک خطے کے حالات مستحکم نہیں ہوتے اسٹیڈیم میں شائقین کو آنے کی اجازت نہیں ہوگی۔
محسن نقوی نے مزید کہا کہ اب پی ایس ایل کے میچز صرف 26 مارچ سے لاہور اور کراچی میں منعقد ہوں گے اور دیگر شہروں میں میچز ختم کر دیے گئے ہیں۔ ان کا کہنا تھا کہ یہ اقدامات خطے میں جاری کشیدگی، ایران، اسرائیل اور امریکا کے درمیان جنگ اور عوام کی حفاظت کو مدنظر رکھتے ہوئے کیے گئے ہیں تاکہ کھلاڑیوں اور عوام کی حرکت کم سے کم ہو اور میچز محفوظ طریقے سے کھیلے جائیں۔
چیئرمین پی سی بی نے بتایا کہ افتتاحی تقریب بھی منسوخ کر دی گئی تاکہ صرف کھیل پر توجہ دی جا سکے اور غیر ضروری اجتماعات سے بچا جا سکے۔
محسن نقوی نے کہا کہ یہ فیصلے پاکستان کی بین الاقوامی پہچان کے پیش نظر کیے گئے ہیں اور عوام کی سلامتی ہمیشہ اولین ترجیح ہے۔