وفاقی وزیر محمد جنید انوار چوہدری نے اعلان کیا ہے کہ پاکستان میں نئے ڈیپ سی پورٹس کے مقامات کی نشاندہی کے لیے اجلاس منعقد کیا گیا ہے جبکہ پاکستان میری ٹائم انرجی سٹی کے قیام کا بھی منصوبہ تیار کیا جا رہا ہے۔
جنید انوار چوہدری کے مطابق انرجی سٹی میں تیل، ایل این جی اور ایل پی جی ذخیرہ کرنے کی جدید سہولیات فراہم کی جائیں گی اور عالمی سرمایہ کاروں کو ہر ممکن سہولیات مہیا کی جائیں گی۔ اس کے ساتھ ہی منصوبے کا مقصد پاکستان کو علاقائی انرجی لاجسٹکس مرکز بنانا اور ملکی ضروریات کو ترجیح دینا ہے جبکہ عالمی توانائی کے تقاضے بھی پورے کیے جائیں گے۔
انہوں نے بتایا کہ چھوٹے انرجی یونٹس بڑی بندرگاہوں کی معاونت کے لیے قائم کیے جائیں گے اور منصوبے پر صوبائی حکومتوں سمیت تمام اسٹیک ہولڈرز سے مشاورت کی جائے گی۔ ساحلی پٹی پر 3 سے 4 نئی بندرگاہوں کی فیزیبلٹی رپورٹ آخری مراحل میں داخل ہو چکی ہے۔
وفاقی وزیر کے مطابق پاکستان نے علاقائی کشیدگی کے باوجود ٹرانس شپمنٹ میں اپنی صلاحیت ثابت کی ہے اور سو سالہ وژن کے تحت بحری شعبے میں طویل المدتی منصوبہ بندی جاری ہے۔