کراچی میں شدید بارش اور ژالہ باری کے بعد کے-الیکٹرک کا بجلی تقسیمی نظام مستحکم ہے اور تقریباً 2100 فیڈرز میں سے 2000 سے زائد فیڈرز سے بلا تعطل بجلی کی فراہمی جاری ہے۔
ترجمان کے-الیکٹرک کے مطابق بارش اور ژالہ باری کے دوران تقریباً 500 فیڈرز متاثر ہوئے تھے تاہم بارش رکنے کے بعد صورتحال تیزی سے معمول پر آ گئی۔ شام 6:30 بجے تک متاثرہ فیڈرز کی تعداد تقریباً 120 رہ گئی۔
کے-الیکٹرک کی فیلڈ ٹیمیں متحرک ہیں اور شہر بھر میں بجلی کی فراہمی کی مسلسل نگرانی کی جا رہی ہے۔ ترجمان نے کہا کہ حفاظتی پروٹوکول کے تحت نشیبی علاقوں اور غیر قانونی کنڈوں والے مقامات پر بجلی کی فراہمی عارضی طور پر معطل کی جاتی ہے تاکہ کسی بھی حادثے سے بچا جا سکے۔
شہریوں سے درخواست کی گئی ہے کہ بارش کے دوران کسی بھی سیفٹی ایمرجنسی کی صورت میں فوری طور پر 118 پر رابطہ کریں۔ اس کے علاوہ ادارے سے سوشل میڈیا چینلز اور کے-ای لائیو ایپ کے ذریعے بھی مدد حاصل کی جا سکتی ہے۔