پاکستان کرکٹ بورڈ سابق کپتان اور مایہ ناز بیٹسمین یونس خان کو ڈومیسٹک کرکٹ کے معاملات کی ذمہ داری سونپنے کے لیے راضی کرنے کی کوشش کر رہا ہے۔
ذرائع کے مطابق پی سی بی چاہتا ہے کہ یونس خان ڈائریکٹر ڈومیسٹک کرکٹ کا عہدہ سنبھالیں تاہم اس حوالے سے ابھی بات چیت جاری ہے اور حتمی فیصلہ یونس خان کی رضامندی کے بعد ہی کیا جائے گا۔
ادھر موجودہ ڈائریکٹر ڈومیسٹک خرم نیازی کو وفاقی حکومت کی جانب سے اسلام آباد میں ایک اہم ذمہ داری سونپی جا رہی ہے جس کے بعد وہ جلد نئی اسائنمنٹ پر چلے جائیں گے۔ خرم نیازی جو پی سی بی میں ڈیپوٹیشن پر تعینات تھے فروری کے آخر میں اپنی دو سالہ مدت مکمل کر چکے ہیں۔
ذرائع کا کہنا ہے کہ پی سی بی کے چیئرمین محسن نقوی یونس خان کو ڈومیسٹک کرکٹ کی بہتری کے لیے اہم کردار دینا چاہتے ہیں۔
واضح رہے کہ یونس خان اس سے قبل قومی ٹیم کے بیٹنگ کوچ بھی رہ چکے ہیں، تاہم پی سی بی کے ساتھ اختلافات کے باعث انہوں نے یہ عہدہ چھوڑ دیا تھا۔