ملک بھر میں روزمرہ اشیاء کی قیمتیں بڑھ گئیں، شہری پریشان

ملک بھر میں مہنگائی کا طوفان تھم نہیں سکا اور اشیائے خورونوش کی بڑھتی ہوئی قیمتوں نے شہریوں کی مشکلات میں اضافہ کر دیا ہے۔

لاہور میں چکن کے سرکاری نرخ 595 روپے فی کلو مقرر ہیں مگر بازار میں 630 روپے فی کلو تک فروخت ہو رہا ہے جبکہ انڈوں کی قیمت 232 روپے فی درجن تک پہنچ گئی ہے۔ پھلوں اور دیگر اشیاء کی قیمتوں میں بھی 30 فیصد تک اضافہ ریکارڈ کیا گیا ہے۔

راولپنڈی میں زندہ مرغی کی قیمت 470 روپے فی کلو تک پہنچ گئی ہے اور مرغی کا گوشت 650 روپے فی کلو میں فروخت ہو رہا ہے۔ پشاور میں صرف ایک دن میں زندہ مرغی کی قیمت 455 روپے سے بڑھ کر 490 روپے فی کلو ہو گئی، جبکہ مرغی کے گوشت کی قیمت 780 روپے فی کلو تک جا پہنچی۔

شہریوں کا کہنا ہے کہ پیٹرولیم مصنوعات کی قیمتیں کم ہونے کے باوجود روزمرہ استعمال کی اشیاء سستی نہیں ہوئی بلکہ مزید مہنگی ہو گئی ہیں اور متعلقہ ادارے و ضلعی انتظامیہ قیمتوں پر قابو پانے میں ناکام نظر آ رہے ہیں۔

عوام نے حکومت سے مطالبہ کیا ہے کہ ناجائز منافع خوری اور خودساختہ مہنگائی کا فوری نوٹس لیا جائے تاکہ عام آدمی کو ریلیف فراہم کیا جا سکے۔