آسٹریلیا کے سابق وائٹ بال کپتان ڈیوڈ وارنر نے واضح کیا ہے کہ ان کی انگلینڈ کے سابق کھلاڑی معین علی اور کراچی کنگز کے مینیجر حیدر اظہر کے درمیان کوئی تلخ کلامی نہیں ہوئی۔
کراچی کنگز کے پچھلے میچ کے بعد وائرل ہونے والے ویڈیو کلپس میں دکھایا گیا کہ مینیجر حیدر اظہر وارنر سے بات کر رہے تھے اور بعد میں معین علی گفتگو میں شامل ہو گئے۔ تاہم سوشل میڈیا پر خاص کر بھارت کے صارفین نے اس واقعے کو بڑھا چڑھا کر پیش کیا اور دعویٰ کیا کہ وارنر اور معین علی کا مینیجر کے ساتھ جھگڑا ہوا۔
اس صورتحال پر وارنر نے اپنے سوشل میڈیا اکاؤنٹ پر وضاحت کی کہ یہ سب افواہیں ہیں اور ان کی کراچی کنگز کے مینیجر کے ساتھ کوئی اختلاف نہیں ہوا۔ وارنر نے مسکراہٹ والی ایموجیز کے ساتھ کہا کہ وہ کراچی کنگز کی کپتانی کر کے اور ٹیم کے ساتھ کھیل کر خوش ہیں اور پی ایس ایل میں کھیلنے کا بہت لطف اٹھا رہے ہیں۔
یاد رہے کہ چونکہ پی ایس ایل اور انڈین پریمیئر لیگ ایک ساتھ چل رہے ہیں کرکٹ شائقین سوشل میڈیا پر زیادہ سرگرم ہیں، اور بعض بھارتی صارفین پی ایس ایل میں غیر ملکی کھلاڑیوں کے حوالے سے جھوٹے تنازعات پھیلا رہے ہیں۔