پاکستان کرکٹ بورڈ کے چیئرمین محسن نقوی نے اسلام آباد یونائیٹڈ سے تعلق رکھنے والے نوجوان کھلاڑی سمیر منہاس اور ان کے والد کاشف منہاس سے اسلام آباد میں خصوصی ملاقات کی۔
اس ملاقات کے دوران چیئرمین پی سی بی نے سمیر منہاس کو ان کی حالیہ بہترین کارکردگی پر مبارکباد دی اور ان کی صلاحیتوں کو سراہا۔
ملاقات میں محسن نقوی نے سمیر کے والد کاشف منہاس سے گفتگو کرتے ہوئے نوجوان کرکٹر کے مستقبل کے حوالے سے مفید مشورے دیے۔ انہوں نے زور دیا کہ سمیر ایک باصلاحیت کھلاڑی ہے، اسے چاہیے کہ وہ اپنی خوراک اور ورزش پر بھرپور توجہ دے تاکہ اپنی فٹنس کو برقرار رکھ سکے۔
محسن نقوی کا مزید کہنا تھا کہ سمیر کو جو عزت مل رہی ہے، اس کے پیش نظر اسے مزید عاجزی اور محنت کے ساتھ اپنے کھیل پر توجہ مرکوز کرنی چاہیے۔ انہوں نے امید ظاہر کی کہ اگر سمیر کا فوکس اپنی گیم پر رہا تو وہ مستقبل میں بہت آگے جائے گا۔
اس موقع پر سمیر منہاس کے والد کاشف منہاس نے چیئرمین پی سی بی کو یقین دہانی کرائی کہ ان کے بچے محنتی ہیں اور ان کا دماغ کرکٹ سے نہیں ہٹے گا۔ انہوں نے بتایا کہ سمیر کی باڈی فٹنس کے لیے خصوصی طور پر ٹرینر رکھا گیا ہے۔
دوران گفتگو جب کھانے کا ذکر ہوا تو کاشف منہاس نے بتایا کہ وہ سمیر کو خوراک میں خاص طور پر پائے اور بڑا گوشت کھلاتے ہیں، جس پر محسن نقوی نے خوشگوار لہجے میں جواب دیا کہ پائے تو انہیں بھی بہت پسند ہیں۔
چیئرمین پی سی بی نے کھلاڑی اور ان کے والد کے لیے اپنی نیک خواہشات کا اظہار کیا۔