گوادر پورٹ پر ایک اور کارگو جہاز کی آمد ہوئی ہے جسے بندرگاہ پر بڑھتی ہوئی تجارتی سرگرمیوں کا اہم اشارہ قرار دیا جا رہا ہے۔
وزیر بحری امور محمد جنید انوار چوہدری کے مطابق ایم وی ریوا گلوری” نامی جہاز 14 ہزار 629 میٹرک ٹن کارگو لے کر گوادر پورٹ پہنچا۔
انہوں نے کہا کہ گوادر پورٹ پر کارگو جہازوں کی آمد میں مسلسل اضافہ ہو رہا ہے جو اس بندرگاہ کی اسٹریٹجک اور تجارتی اہمیت میں اضافے کا واضح ثبوت ہے۔
وزیر بحری امور کا کہنا تھا کہ بندرگاہ پر بڑھتی ہوئی سرگرمیوں سے ظاہر ہوتا ہے کہ عالمی شپنگ کمپنیوں کا اعتماد بحال ہونا شروع ہو چکا ہے۔
انہوں نے مزید بتایا کہ حکومت بندرگاہی نظام کو مزید مؤثر اور عالمی معیار کے مطابق بنانے کے لیے اقدامات کر رہی ہے جبکہ سرمایہ کاروں اور شپنگ کمپنیوں کو مکمل سہولیات فراہم کی جائیں گی۔
حکومت کے مطابق گوادر پورٹ کو خطے میں ٹرانزٹ اور ٹرانس شپمنٹ تجارت کا اہم مرکز بنانے کے لیے کام جاری ہے اور اسے عالمی معیار کا میرین گیٹ وے بنانے کا ہدف مقرر کیا گیا ہے۔