مشرق وسطیٰ میں جاری جنگی صورتحال کے باوجود اوورسیز پاکستانیوں نے ملکی معیشت کا سہارا بنتے ہوئے مارچ کے دوران قابلِ ذکر زرمبادلہ وطن بھیجا ہے۔
اسٹیٹ بینک آف پاکستان کی جانب سے جاری کردہ اعداد و شمار کے مطابق مارچ 2026 میں اوورسیز پاکستانیوں نے 3 ارب 83 کروڑ ڈالر وطن منتقل کیے۔ ترسیلات زر میں ماہانہ بنیاد پر 17 فیصد اضافہ ریکارڈ کیا گیا تاہم سالانہ بنیاد پر یہ شرح 5.5 فیصد کم رہی۔
اعداد و شمار کے مطابق رواں مالی سال کے ابتدائی 9 ماہ میں پاکستان کو مجموعی طور پر 30 ارب 30 کروڑ ڈالر کی ترسیلات موصول ہوئیں جو گزشتہ مالی سال کے اسی عرصے کے مقابلے میں 8 فیصد زیادہ ہیں۔
مارچ کے دوران سب سے زیادہ ترسیلات سعودی عرب سے موصول ہوئیں جہاں مقیم پاکستانیوں نے 92 کروڑ ڈالر وطن بھیجے۔ اس کے بعد متحدہ عرب امارات میں مقیم پاکستانیوں نے 82 کروڑ ڈالر ارسال کیے۔
اسی طرح برطانیہ سے 59 کروڑ ڈالر اور امریکا میں مقیم پاکستانیوں نے 36 کروڑ ڈالر وطن منتقل کیے۔