سری لنکا کے فاسٹ بولر نوان تھشارا نے سری لنکن کرکٹ بورڈ سے باضابطہ طور پر معافی مانگ لی ہے اور اپنے خلاف جاری قانونی کارروائی واپس لینے کا اعلان کر دیا ہے۔
سری لنکن میڈیا رپورٹس کے مطابق 31 سالہ فاسٹ بولر نے ای میل کے ذریعے سری لنکا کرکٹ بورڈ سے معذرت کی اور کہا کہ ان کا مقصد صرف شفافیت اور انصاف کا حصول تھا۔
انہوں نے اپنے بیان میں کہا کہ سری لنکا کرکٹ اور متعلقہ حکام کو ان کے اقدامات سے جو بھی تکلیف یا پریشانی ہوئی اس پر وہ دل سے معذرت خواہ ہیں۔
نوان تھشارا نے واضح کیا کہ وہ قانونی کارروائی واپس لینے اور معاملے کو خوش اسلوبی سے حل کرنے کے لیے تیار ہیں۔
واضح رہے کہ کرکٹر نے مختلف لیگز کے لیے این او سی نہ ملنے پر بورڈ کے خلاف عدالت سے رجوع کیا تھا جس کے بعد یہ معاملہ تنازع کی صورت اختیار کر گیا تھا۔