کراچی کنگز کے اونر سلمان اقبال نے ایچ بی ایل پی ایس ایل ڈیجیٹل سے گفتگو کرتے ہوئے کہا ہے کہ کسی بھی فرنچائز کی کامیابی کے لیے ٹیم ممبران کا آپس میں مضبوط تعلق انتہائی اہم ہوتا ہے۔
انہوں نے بتایا کہ گزشتہ سال کی طرح اس بار بھی ڈیوڈ وارنر کو کپتان برقرار رکھا گیا ہے، جبکہ ٹیم کے مڈل آرڈر کو مضبوط کرنے کے لیے انگلینڈ کے معین علی کو پری آکشن میں سائن کیا گیا ہے۔
سلمان اقبال کے مطابق وکٹ کیپر بلے باز اعظم خان کو تین کروڑ روپے میں خریدا گیا ہے جو پہلی بار اپنے آبائی شہر کی نمائندگی کر رہے ہیں۔
سلمان اقبال نے اعتراف کیا کہ لاہور قلندرز ایک ایسا حریف ہے جس کے خلاف کھیلتے ہوئے کراچی کنگز دباؤ محسوس کرتی ہے۔ انہوں نے دیگر ٹیموں کے حوالے سے کہا کہ حیدر آباد، راولپنڈی اور ملتان سلطانز کے نئے مالکان، کپتانوں اور کوچز کو سیٹ ہونے میں کچھ وقت لگے گا، تاہم ان کے خیال میں حیدر آباد کی ٹیم کافی متوازن ہے۔
انہوں نے مزید کہا کہ جب فرنچائز مالکان ٹیم کے ساتھ وقت گزارتے ہیں تو کھلاڑیوں کے حوصلے بلند ہوتے ہیں۔ سلمان اقبال نے انکشاف کیا کہ تین سال قبل انہوں نے ٹیم بنانے کا اختیار سپورٹ اسٹاف کو دے دیا تھا لیکن نتائج بہتر نہ آنے پر انہوں نے دوبارہ ڈرائیونگ سیٹ سنبھال لی ہے۔